Blog

اسلام آباد(کنزیور واچ نیوز)پاکستان کے کامیاب آپریشن بنیان مرصوص کی اہمیت کو کم کرنے کیلئے بھارت کا بڑا منصوبہ بے نقاب ہوگیا۔رپورٹ کے مطابق ذرائع نے کہا کہ پاکستانی مسلح افواج کے ہاتھوں آپریشن بنیان مرصوص میں ہزیمت اٹھانے کے بعد بھارتی سرکار اور مسلح افواج تاحال تڑپ رہی ہیں، بھارتی خفیہ ایجنسیوں نے آپریشن بنیان مرصوص کی اہمیت کو ختم کرنے کیلئے فتنہ الخوراج کے سابق ترجمان کی خدمات حاصل کرلیں۔سیکیورٹی ذرائع نے کہا کہ احسان اللہ احسان نے بھارتی اخبار دی سنڈے گارڈین میں ایک مضمون لکھا ہے جس میں بے بنیاد دعویٰ کیا گیا ہے کہ پاکستان مقبوضہ کشمیر کے اندر مزید دو دہشتگردانہ حملوں کی منصوبہ بندی کر رہا ہے۔

اسلام آباد:(کنزیومرواچ نیوز)وزارت داخلہ نے قومی اسمبلی میں انکشاف کیا ہے کہ سال 2024 سے لے کر اب تک 5ہزار402 پاکستانی بھکاریوں کو مختلف ممالک سے ملک بدر کیا جا چکا ہے۔ایوان میں جمع کرائی گئی تحریری رپورٹ کے مطابق ملک بدر کیے گئے بھکاریوں کی سب سے زیادہ تعداد سعودی عرب سے سامنے آئی ہے، جہاں سے 5ہزار33 پاکستانی بھکاریوں کو واپس بھیجا گیا۔
سال 2024 کے دوران مجموعی طور پر 4ہزار850 پاکستانی بھکاری بیرون ممالک سے ملک بدر کیے گئے۔
سعودی عرب سے 4,498،عراق سے 242،ملیشیا سے 55،متحدہ عرب امارات (یو اے ای) سے 49،سال 2025 کے اب تک کے عرصے میں 552 پاکستانی بھکاری ملک بدر کیے جا چکے ہیں۔سعودی عرب سے 535،یو اے ای سے 9،عراق سے 5
اس فہرست میں قطر اور عمان جیسے خلیجی ممالک کا بھی ذکر کیا گیا ہے، تاہم وہاں سے ملک بدر کیے گئے افراد کی تعداد کی الگ تفصیل فراہم نہیں کی گئی۔

اسلام آباد :(کنزیومر واچ نیوز) پاکستان کی بھارت کیخلاف فوجی کامیابی کے بعد، سوشل میڈیا پر بے مثال جشن کا سماں ہے اور خصوصاً بین الاقوامی مسلم کمیونٹی اور مغربی معاشروں کے غیر متوقع گوشوں کی طرف سے پاک فوج کی حمایت و مقبولیت بڑھ گئی ہے۔ سوشل میڈیا پاکستان اور پاکستان کی مسلح افواج کی تعریفوں سے بھرا ہوا ہے، مختلف براعظموں کے لاکھوں افراد پاک فوج کی کارکردگی کو سراہ رہے ہیں۔ ترکی، ایران، بنگلہ دیش، فلسطین، سعودی عرب، آذربائیجان، اور وسطی ایشیاء اور مشرق وسطیٰ کے مختلف ممالک سے آنے والی زبردست تعریفیں اور ’’پاکستان زندہ باد‘‘ کے نعروں کی گونج انسٹاگرام، ایکس (سابقہ ٹوئٹر) اور ٹک ٹوک پر ہر جگہ سنائی دے رہی ہے۔

جدہ (کنزیومر واچ نیوز)امریکی صدر ڈونلڈ ٹرمپ نے امید ظاہر کی ہے کہ پاک بھارت جنگ بندی قائم رہے گی اور ممکن ہے امریکا دونوں ممالک کے رہنماؤں کو عشائیہ پر اکٹھا کرلے۔امریکا کے صدر ڈونلڈ ٹرمپ نے دورہ سعودی عرب میں گفتگو کرتے ہوئے کہا کہ پاکستان اور بھارت کے تعلقات میں بہتری آرہی ہے، ممکن ہے امریکا ان ممالک کے لیڈروں کو ایک جگہ جمع کرلے۔ ٹرمپ نے کہا کہ کچھ ہی روز پہلے میری انتظامیہ تشدد کے بڑھتے واقعات رکوانے کیلئے تاریخی جنگ بندی میں کامیاب ہوئی ہے۔ اس کے لیے تجارت کو بڑی حد تک استعمال کیا۔

اسلام آباد(کنزیومر واچ نیوز)امریکی ٹریول وی لاگر پاک بھارت کشیدگی کے دوران پاکستانی عوام کو پُرسکون دیکھ کر دنگ رہ گیا۔مقبوضہ کشمیر کے سیاحتی مقام پہلگام حملے کے بعد پاکستان اور بھارت کے درمیان کشیدگی شدت اختیار کرگئی تھی جس کے بعد بھارت نے 6 اور 7 مئی کی درمیانی شب کشمیر اور پنجاب کے مختلف علاقوں میں حملے کرکے 31 پاکستانیوں کو شہید کردیا تھا۔تاہم اس کے بعد پاکستان نے بھارتی جارحیت کا منہ توڑ جواب دیتے ہوئے کامیاب آپریشن بنیان مرصوص کیا جس میں بھارت کو شکست کا سامنا کرنا پڑا۔پاک بھارت کشیدگی کے دوران فلائٹ آپریشن معطل کیا گیا جس کی وجہ سے بیشتر ملکی اور غیر ملکی افراد پاکستان میں ہی پھنس گئے تھے۔انہی لوگوں میں ایک امریکی ٹریول وی لاگر ڈریو بنسکی بھی شامل ہیں جو پاکستان کے دورے پر آئے ہوئے تھے اور کشمیر میں پھنسنے کی وجہ سے ان کا دورہ بھی طویل ہوگیا۔اسی دوران انہوں نے اپنی وی لاگنگ جاری رکھی اور کشمیر میں معمولات زندگی سے اپنے فالوورز کو آگاہ کیا۔انہوں نے سائٹ انسٹاگرام پر اپنی ویڈیو شیئر کرتے ہوئے بتایا کہ بہت سے لوگ میری خیریت دریافت کرنے کے لیے مجھے کالز اور میسجز کر رہے ہیں تو میں انہیں بتانا چاہتا ہوں کہ میں بالکل خیرت سے ہوں۔وی لاگر نے مزید بتایا کہ یہاں سڑکوں پر لوگ اپنے ملک کی سلامتی اور فوج کے ساتھ اظہارِ یکجہتی کے لیے ریلیاں نکال رہے ہیں۔امریکی وی لاگر کا کہنا تھا کہ حیرت کی بات یہ ہے کہ پاکستانی عوام اس کشیدہ صورتحال میں بھی بہت بے فکر نظر آ رہی ہے، ہر کوئی اپنی زندگی معمول کے مطابق گزار رہا ہے، دکانیں کھلی ہیں اور بچے اسکول جارہے ہیں۔