راولپنڈی (کنزیومر واچ نیوز)راولپنڈی کی نجی ہاؤسنگ سوسائٹی میں 2 افراد برساتے نالے میں بہہ گئے۔پنجاب میں مون سون کی شدید بارشیں جاری ہیں جہاں ندی نالوں میں شدید طغیانی ہے جس کی ویڈیوز بھی سامنے آرہی ہیں۔منگل کو راولپنڈی میں شدید بارش ہوئی جہاں نجی ہاؤسنگ سوسائٹی کے فیز 5 میں کار میں سوار باپ بیٹی برساتی نالے میں بہہ گئے، گاڑی سمیت نالے میں بہہ جانے والے باپ بیٹی مدد کے لیے پکارتے رہے۔کار سوار افراد نے برساتی نالے کے قریب سے گاڑی گزارنے کی کوشش کی لیکن پانی کابہاؤ تیز ہونے کی وجہ سے دونوں افراد کار سمیت پانی میں بہہ گئے۔ریسکیو حکام کے مطابق پانی میں بہہ جانے والے افراد کی تلاش کے لیے آپریشن شروع کردیا گیا ہے اور تاحال دونوں کو تلاش نہیں کیا جاسکا ہے۔
Blog
-
بابو سر ٹاپ پر متعدد سیاح سیلابی ریلے میں بہہ کر لاپتا ہوگئے
اسکردو(کنزیومر واچ نیوز) چلاس میں سیاحتی مقام بابو سر ٹاپ پر متعدد سیاح سیلابی ریلے میں بہہ کر لاپتا ہوگئے جن کی تلاش کے لیے ریسکیو آپریشن جاری ہے۔
نجی ٹی وی کے مطابق بابو سر ٹاپ پر فلیش فلڈ کے باعث سیلابی ریلہ آیا جس میں بہہ کر متعدد سیاح لاپتا ہوگئے جن کی تلاش کے لیے ریسکیو آپریشن جاری ہے جب کہ مقامی لوگوں نے بھی سیاحوں کو ریسکیو کیا ہے۔
اس حوالے سے ڈپٹی کمشنر دیامر عطاء الرحمان نے بتایا کہ بابوسر سے نیچے تھک کے مقام پر کلاوڈ برسٹ ہوا ہے، لینڈ سلائیڈنگ کے باعث بابو سر روڈ بند ہوگئی ہے جب کہ 7 سے 8 کلو میٹر روڈ مکمل طور پر تباہ ہوئی ہے۔
ڈی سی کے مطابق 3 افراد کی لاشیں بھی ملی ہیں اور ایک معمر شخص شدید زخمی حالت میں ملا ہے جسے اسپتال منتقل کیا گیا جب کہ 10 سے 15 گاڑیاں سیلابی ریلے میں بہہ گئی ہیں جن میں کوسٹرز بھی شامل ہیں۔
ملک بھر میں مون سون بارشوں کے باعث ہلاکتوں کی تعداد 221 ہوگئی
ڈپٹی کمشنر نے مزید بتایا کہ قدرتی آفت سے بجلی اور فائبر آپٹک لائن متاثر ہوئی جس کے باعث رابطوں میں دشواری کا سامناہے، سیلاب متاثرہ علاقے میں مشینری پہنچا رہے ہیں،کچھ علاقوں میں مشینری پہنچ چکی ہے، ناران سے بھی بابو سر روڈ کو کھولنے کی کوشش کرینگے۔
ڈی سی کا کہنا تھا کہ سیلاب متاثرہ علاقے میں مشینری پہنچا رہے ہیں،کچھ علاقوں میں مشینری پہنچ چکی ہے، زخمیوں کو ایمبولینسز کے ذریعے آر ایچ کیو منتقل کرچکے ہیں۔
انہوں نے مزید کہا کہ قدرتی آفات کے ردعمل میں جو کچھ کرسکتے ہیں وہ کررہے ہیں، ابھی تک 3 لاشیں ملی ہیں ، ابھی یہ کنفرم کرنا باقی ہے کہ یہ ڈیڈ باڈیز سیاحوں کی ہیں یا کہ مقامی افراد کی، ابھی ہم متاثرہ افراد کو امدادی سامان کھانا اور پانی وغیرہ فراہم کریں گے۔
اس حوالے سے ترجمان گلگت بلتستان حکومت فیض اللہ فراق نے بتایا کہ شاہراہ بابوسر میں صبح سرچ آپریشن کا آغاز کر دیا گیا ہے اور لاپتا افراد کی تلاش جاری ہے۔
ترجمان نے کہا کہ سیلاب سے گرلز اسکول، 2 ہوٹل، پولیس چوکی، پولیس شیلٹر اور شاہراہ بابوسر سے متصل 50 سے زائد مکانات مکمل تباہ ہوئے، 8 کلومیٹر سڑک شدید متاثرہ اور 15مقامات پر روڈ بلاک ہے جب کہ شاہراہ بابوسر پر 4 رابطہ پل بھی تباہ ہوئے ہیں۔
ترجمان گلگت بلتستان حکومت کے مطابق سیکڑوں پھنسے سیاحوں کو چلاس شہر منتقل کرنے کا عمل جاری ہے اور اب تک 200 سے زائد سیاحوں کو ریسکیو کر کے چلاس پہنچا دیا گیا ہے، بابوسر میں مواصلاتی نظام نہ ہونے سے سیاحوں کا رابطہ گھروں سے منقطع ہے تاہم چلاس کے ہوٹلز اور گیسٹ ہاؤسز مسافروں اور سیاحوں کیلئے مفت کھول دیے ہیں۔
پاک فوج کی امدادی کارروائیاں جاری
شاہراہ بابوسر، شاہراہ قراقرم پر پھنسےسیاحوں اور مسافروں کےلیے پاک فوج کی جانب سے بھی ریسکیو آپریشن جاری ہے جس دوران سیاحوں اور مسافروں کو ہیلی کاپٹرز کے ذریعے محفوظ مقامات پر منتقل کردیا گیا ہے۔پاک فوج، جی بی اسکاوٹس ٹیمیں متاثرہ افراد کو اشیاءخوردونوش فراہم کررہی ہیں، زخمیوں کو طبی امداد بھی دی جا رہی ہے ، مشینری اور افرادی قوت سڑکوں کی بحالی پر کام کررہےہیں اور بابوسر اور قراقرم ہائی وے پر رکاوٹیں دور کی جارہی ہیں جب کہ گم شدہ افراد کی تلاش کے لیے سرچ اینڈ ریسکیو ٹیمیں روانہ کردی گئی ہیں۔ -
بلوچستان واقعہ، فائرنگ کرنے والے شخص سمیت مزید 2 ملزمان گرفتار، مقدمہ درج
کوئٹہ (کنزیومر واچ نیوز)بلوچستان میں غیرت کے نام پر مرد و عورت کو فائرنگ کرکے قتل کرنے کے واقعے کی وائرل ہونے والی ویڈیو میں نظر آنے والے مزید دو ملزمان کو گرفتار کر لیا گیا ہے۔پولیس کا کہنا ہے کہ مرد اور خاتون کے قتل کی وائرل ویڈیو میں نظر آنے والے مزید 2 ملزمان کو گرفتار کر لیا گیا ہے جس کے بعد گرفتار ملزمان کی تعداد 13 ہو گئی ہے، فائرنگ کرنے والے شخص اور ویڈیو میں نظر آنے والے ایک شخص کو گرفتار کیا گیا ہے۔پولیس کا کہنا ہے کہ واقعے میں ملوث قبائلی رہنما شیر باز سمیت 13 مشتہ افراد کو گرفتار کیا جا چکا ہے، واقعے کی تحقیقات کر رہےہیں، جلد دیگر ملزمان کو بھی گرفتار کر لیا جائے گا۔ادھر بلوچستان کے علاقے سنجیدی ڈیگاری میں ایک مرد اور خاتون کو فائرنگ کر کے قتل کرنےکا مقدمہ درج کر لیا گیا ہے۔پولیس کے مطابق مقدمہ ہنہ اوڑک تھانے میں انسداد دہشتگردی ایکٹ، قتل اور قتل میں معاونت کی دفعات کے تحت درج کیا گیا ہے۔وزیراعلیٰ بلوچستان سرفراز بگٹی کا کہنا ہے کہ آپریشن جاری ہے، تمام ملوث افراد کو کیفر کردار تک پہنچایا جائے گا، ریاست مظلوم کے ساتھ ہے۔ترجمان حکومت بلوچستان شاہد رند نے بتایا کہ غیرمصدقہ اطلاعات کے مطابق فائرنگ کا واقعہ عیدالاضحیٰ کے قریب کا ہے، اب تک لاشیں برآمد نہیں ہوئیں، دونوں فیملیز کی جانب سے واقعے کو رپورٹ نہیں کیا گیا، ویڈیو میں نظر آنے والے افراد کی شناخت کے لیے ڈیٹا نادرا بھیجا گیا ہے۔خیال رہے کہ بلوچستان کے علاقے سنجدی ڈیگاری میں غیرت کے نام پر مرد و عورت کو فائرنگ کرکے قتل کرنے کا واقعہ پیش آیا تھا جس کی ویڈیو کچھ روز قبل منظر عام پر آئی تھی۔ وزیر اعلیٰ بلوچستان میر سرفراز بگٹی نے قاقعے کا نوٹس لیا تاگھ۔
-
کراچی: پلاٹ کے تنازع پر بہن نے بھائی کو ڈنڈے مار کر قتل کردیا
کراچی(کنزیومر واچ نیوز) ملیر میں پلاٹ کے تنازع پر بہن نے بھائی کو قتل کردیا۔پولیس کے مطابق یہ واقعہ ملیر کے علاقے ریڑھی گوٹھ میں پیش آیا جہاں خاندان میں پلاٹ کا تنازع چل رہا تھا۔پولیس کا بتانا ہےکہ ملزمہ نے جائیداد کے تنازع پربھائی کو ڈنڈے مار کر قتل کیا جس کا اس نےا عتراف بھی کیا ہے۔پولیس کا کہنا ہے کہ ملزمہ کے خلاف مقدمہ درج کرکے مزید تحقیقات شروع کردی ہے۔
-
حمیرا کی موت کےبعد انکے نمبر سے لاسٹ سین ہٹایا گیا: ہیئر اسٹائلسٹ
کراچی( کنزیومر واچ نیوز) 8 جولائی کو ڈیفنس فیز 6 کے ایک فلیٹ سے مردہ پائی جانے والی حمیرا اصغر کے کیس میں مزید انکشافات ہوئے ہیں۔9 ماہ سے اداکارہ حمیرا اصغر کی گمشدگی کادعویٰ کرنیوالے اسٹائلسٹ دانش مقصود نے تہلکہ خیز دعویٰ کیا ہے کہ ’ اداکارہ کے فون پر 5 فروری کے بعد سرگرمیاں ہوئیں، اس دوران ان کے واٹس ایپ سے نہ صرف ڈی پی ہٹائی گئی بلکہ ان کا لاسٹ سین بھی غائب کردیا گیا‘ ۔دانش مقصود نےنجی ٹی وی کو بتایا کہ ’ حمیرا سے میری آخری بات چیت 2 اکتوبر کو ہوئی تھی لیکن ان کے واٹس ایپ پر لاسٹ سین کی تاریخ 7 اکتوبر 2024 کی تھی، اس کے بعد میں نے متعدد مرتبہ حمیرا سے رابطہ کرنے کی کوشش کی، اس دوران کالز اور میسیجز بھیجے جو کبھی پڑھے نہیں گئے‘ ۔دانش مقصود کے مطابق ’جب کئی ماہ تک حمیرا اصغر کے حوالے سے کوئی خبر سامنے نہ آئی تو ان کے لاپتا ہونے سے متعلق سوشل میڈیا پر پوسٹ لگانے کا فیصلہ کیا، سوشل میڈیا پر پوسٹ شیئر کرنے سے پہلے بھی حمیرا کے موبائل نمبر پر ایک مرتبہ پھر رابطہ کرنے کی کوشش کی لیکن ناکامی ہونے پر 5 فروری کو سوشل میڈیا پر پوسٹ شیئر کردی‘۔انہوں نے کہا کہ ’5 فروری کو پوسٹ لگانے کے بعد اگلے دن پھر رابطہ کیا تو حمیرا اصغر کے واٹس ایپ سے نہ صرف ان کی ڈی پی غائب تھی بلکہ ان کا لاسٹ سین بھی بند کردیا گیا تھا‘۔دوسری جانب ڈی آئی جی ساؤتھ اسد رضا کا کہنا تھا کہ’ اسٹائلسٹ دانش سے رابطہ کیا ہے، ان سے تمام اسکرین شاٹس لے کر اس سے متعلق مزید تحقیقات کا آغاز کردیا گیا ہے‘۔
حمیرا اصغر کی پراسرار موت ، معاملہ کیا ہے؟
حمیرا اصغر کی لاش 8 جولائی کو اتحاد کمرشل کے ایک فلیٹ سے اس وقت ملی جب کرائے کی عدم ادائیگی پر مالک مکان کے عدالت پہنچنے پر عدالتی بیلف ان کے گھر پہنچا اور فلیٹ کا دروازہ نہ کھولنے پر دروازہ توڑا گیا تو اداکارہ کی لاش برآمد ہوئی۔
لاش کے پوسٹ مارٹم کی ابتدائی رپورٹ میں بتایا گیا ہے کہ لاش ڈی کمپوز کے آخری اسٹیج پر ہے جسے دیکھ کر اندازہ کیا جاسکتا ہے کہ اداکارہ کی موت تقریباً 8 ماہ پرانی ہے، کیمیائی تجزیے کے دوران اداکارہ کو زہر دیے جانےکے شواہد نہیں پائے ۔ -
ساحر لودھی کی نقالی ویڈیوز پر مہوش حیات ناراض
کراچی(کنزیومر واچ نیوز)’ساحر کے بھی جذبات ہیں، ساحر لودھی کی نقالی ویڈیوز پر مہوش حیات ناراض ،پاکستانی اداکارہ مہوش حیات نے سوشل میڈیا پر ساتھی اداکاروں کی جانب سے ساحر لودھی کی نقل اتارنے والی وائرل ویڈیوز پر ناراضی کا اظہار کیا ہے۔میزبان و اداکار ساحر لودھی کی کچھ ویڈیوز ان دنوں سوشل میڈیا پر گردش کر رہی ہیں جو ان کے انسٹاگرام اکاؤنٹ پر موجود ہیں۔ویڈیوز بھارتی پاپارازی کے اسٹائل میں بنائی گئی ہیں جیسے کہ ساحر کو معلوم نہیں کہ کوئی ان کی ویڈیو بنانے آ رہا ہے جب کہ کیمرہ مین بھی ان کا اپنا ہے اور یہ ویڈیوز بھی ان ہی کے پیج پر شیئر کی جارہی ہیں۔سوشل میڈیا صارفین کو میزبان کی ان ویڈیوز پر دلچسپ تبصرے کرتے ہی ہیں لیکن اب ساتھی اداکاروں نے بھی اسی طرز کی ویڈیوز بنائی ہیں جن میں ہدایتکار و اداکار یاسر نواز، فیصل قریشی اور اعجاز اسلم شامل ہیں۔
نقالی ویڈیوز:
ویڈیوز کی نقالی کا سلسلہ یاسر نواز نے شروع کیا تھا جس کے بعد دیگر فنکاروں نے بھی ساحر لودھی کے انداز کی نقل کرتے ہوئے ویڈیوز بنانا شروع کردیں۔اسی پر اداکارہ مہوش حیات نے تبصرہ کیا اور ان ویڈیوز پر ناپسندیدگی کا اظہار کیا۔
اداکارہ مہوش حیات کا ردعمل:
انہوں نے انسٹاگرام پر لکھا کہ ساحر لودھی نے اس انڈسٹری میں اپنی ایک منفرد جگہ بنائی ہے اور وہ اب تک اس مقام پر قائم ہیں، جو کہ قابلِ احترام ہے اور یہ بالکل آسان نہیں ہے۔
مہوش حیات کے مطابق آپ کسی کے انداز کو ناپسند کر سکتے ہیں لیکن اس انسان کی بنیادی عزت ہمیشہ برقرار رہنی چاہیے، ساتھ ہی انہوں نے سب کو نرمی برتنے اور شائستگی اختیار کرنے کا مشورہ بھی دیا۔
اداکارہ نے لکھا یہ انتہائی نامناسب اور ناجائز ہے کہ آپ کسی کا مذاق اڑائیں، لوگ بھول گئے ہیں کہ ساحر بھی ایک انسان ہیں اور ان کے بھی جذبات اور احساسات ہیں جیسے کہ ہم سب کے ہیں۔ -
شاہ رخ خان کے دوران شوٹنگ زخمی ہونے کی خبروں کی حقیقت سامنے آگئی
ممبئی (کنزیومر واچ نیوز)شاہ رخ خان کے دوران شوٹنگ زخمی ہونے کی خبروں کی حقیقت سامنے آگئی 2 روز قبل شاہ رخ خان کی صحت سے متعلق خبریں سامنے آئی تھیں کہ اداکار کو فلم ‘کنگ’ کے سیٹ پر حادثہ پیش آیا اور انہیں کمر کی انجری ہوئی ہے جس کے سبب مداحوں میں تشویش کی لہر دوڑ گئی تھی۔میڈیا رپورٹس میں دعویٰ کیا گیا تھا کہ شاہ رخ خان ہدایت کار سدھارتھ آنند کی فلم کنگ کی شوٹنگ کے دوران زخمی ہوگئے ہیں جس کے بعد وہ امریکا روانہ ہوگئے اور علاج و آرام کے لیے جلد ہی برطانیہ منتقل ہو جائیں گے۔
اب این ڈی ٹی وی نے اداکار کے قریبی ذرائع کے حوالے سے خبر شائع کی اور بتایا کہ یہ سب محض افواہ ہے اور ان خبروں میں کوئی صداقت نہیں ہے۔رپورٹ کے مطابق ایک قریبی ذرائع نے وضاحت کی کہ اگرچہ شاہ رخ خان کو ماضی میں مختلف فلموں کی شوٹنگ کے دوران چوٹیں لگتی رہی ہیں جن کا اثر کبھی کبھار ظاہر ہو جاتا ہے لیکن اس بار ایسا کچھ نہیں ہوا۔رپورٹ میں ذرائع کے حوالے سے بتایا گیا کہ شاہ رخ خان باقاعدگی سے اپنے علاج اور فزیوتھراپی کے لیے امریکا جاتے رہتے ہیں، وہ جولائی کے دوسرے ہفتے میں امریکا روانہ ہوئے تھے اور آخر تک واپسی متوقع ہے۔ -
نئے ٹیکس قوانین کیخلاف تاجروں کی ہڑتال، مختلف شہروں میں کاروباربند
ملک کے مختلف شہروں میں ایف بی آر کے نئے ٹیکس قوانین کے خلاف تاجروں کی ہڑتال جاری ہے۔
تاجروں کی ہڑتال کے باعث کراچی، لاہور اور حیدرآباد میں کاروباری مراکز بند ہیں جب کہ کراچی میں بولٹن مارکیٹ اور الیکٹرانکس مارکیٹ سمیت مختلف چھوٹی بڑی مارکیٹیں بند ہیں
ادھر حیدرآباد میں کلاتھ مارکیٹ، اناج منڈی، لوہا مارکیٹ، شاہی بازار، الیکٹرونکس مارکیٹ اور موبائل مارکیٹ بھی بند ہیں۔
اسی طرح لاہور میں چیمبر آف کامرس کی اپیل پر شہر میں تاجر برادری نے ہڑتال کرتے ہوئے مال روڈ اور اس سے ملحقہ تمام مارکیٹیں بند کردیں۔
بادمی باغ آٹو پارٹس مارکیٹ اور لوہا مارکیٹ بھی بند ہے جب کہ صدر ریڈی میڈ گارمنٹس نے بھی آج تمام مارکیٹیں بند رکھنے کا اعلان کیا۔ -
سندھ میں اجرک والی نمبر پلیٹ کے لیے 14 اگست تک توسیع
کراچی (کنزیو مر واچ نیوز)سندھ میں اجرک والی نمبر پلیٹ کے لیے 14 اگست تک توسیع کردی گئی جبکہ پولیس کو چالان سے روک دیا، وزیرِ ایکسائز مکیش کمار چاولہ کا کہنا ہے کہ نمبر پیلٹس پر اجرک کا نشان برقرار رہے گا۔تفصیلات کے مطابق صوبائی وزیرایکسائیز اینڈ ٹیکسیشن نارکوٹیکس مکیش کمار چاولہ نے 14 اگست تک اجرک والی نمبر پلیٹ میں توسیع کرتے ہوئے پولیس کو چالان سے روک دیا۔کراچی میں میڈیا سے گفتگو کرتے ہوئے مکیش کمار چاولہ نے کہا کہ اجرک سندھ کی ثقافت ہے اور نمبر پلیٹس پر رہیں گی، چند لوگوں کو اجرک فوبیا ہو گیا ہے، اجرک سیکیورٹی فیچر نمبر لاؤنچ کی گئی ہے، سیف سٹی کے ساتھ جدید نمبر پلیٹ لگانا لازمی ہے۔صوبائی وزیرایکسائیز اینڈ ٹیکسیشن نارکوٹیکس کا کہنا تھا کہ 14 اگست تک اجرک والی نمبر پلیٹ کے لیے توسیع کردی گئی ہے، مقررہ تاریخ تک اجرک والی نمبر پلیٹ پر کوئی چالان نہیں ہوگا، لیکن مکیش کمار چاولہ نے شہریوں کو خبردار کرتے ہوئے کہا کہ ہیلمٹ، دستاویزات اور دیگر چیزوں پر معمول کے مطابق چالان ہوگا، سیف سٹی کے ساتھ جدید نمبر پلیٹ لگانا لازمی قرار دی گئی ہے۔
-
کراچی والوں کے لیے بھی محکمہ موسمیات نے اچھی خبر دیدی
کراچی (کنزیومر واچ نیوز)محکمہ موسمیات نے خبردار کیا ہے کہ سندھ میں آج سے بارشوں کا نیا سلسلہ شروع ہونے والا ہے، جس کا آغاز دادو سے ہوگا۔دریں اثنا ماہرین کا کہنا ہے کہ کراچی میں مون سون کا تیسرا اسپیل کل سے داخل ہو رہا ہے، جس کے نتیجے میں شہر کے مختلف علاقوں میں ہلکی سے معتدل بارش متوقع ہے۔اُدھر جنوبی پنجاب، خیبر پختونخوا، بلوچستان اور گلگت بلتستان میں بھی آئندہ دنوں کے دوران مزید بارشوں کی توقع ظاہر کی گئی ہے، جہاں بارش کے باعث نشیبی مقامات پر پانی جمع ہونے اور معمولات زندگی متاثر ہونے کے خدشات ہیں۔پنجاب میں حالیہ بارشوں کے نتیجے میں بڑی تباہی ہونے سے نظام زندگی مفلوج ہوکر رہ گیا ہے۔ صوبے بھر میں مختلف حادثات، چھتیں گرنے، کرنٹ لگنے اور دیگر واقعات کے باعث درجنوں افراد جان کی بازی ہار گئے جب کہ سیکڑوں شہری زخمی بھی ہوئے ہیں۔محکمہ موسمیات نے شہریوں کو ہدایت کی ہے کہ وہ غیر ضروری سفر سے گریز کریں اور بارش کے دوران حفاظتی تدابیر اختیار کریں۔ بالخصوص نشیبی علاقوں کے مکینوں کو محتاط رہنے کی تاکید کی گئی ہے تاکہ کسی بھی ممکنہ ہنگامی صورت حال سے بچا جا سکے۔