Blog

اسلام آباد(کنزیومرواچ نیوز) فیڈرل بورڈ آف ریونیو (ایف بی آر) نے سوشل میڈیا پر دولت کی نمائش کرنے والوں کے خلاف کارروائی کا فیصلہ کرلیا۔ذرائع کے مطابق سوشل میڈیا پر دولت کی نمائش کرنے والے لاکھوں افراد کا ڈیٹا جمع کرلیا گیا ہے، پہلے مرحلے میں ایف بی آر ایک لاکھ امیر افراد کا آڈٹ کرے گا۔ذرائع نے بتایا کہ شادیوں پر بڑے اخراجات کرنے والے نان فائلرز کے خلاف بھی کارروائی ہوگی، شادیوں پر 20 ،20 ہزار ڈالر کے سوٹ استعمال کرنے والے پکڑ میں آئیں گے، بنگلوں، گاڑیوں اور زیورات کی نمائش کرنے والوں کو ذرائع آمدن بتانا ہوں گے۔ذرائع کا کہنا ہےکہ ایف بی آر گزشتہ سال جمع کرائے گئے گوشواروں کا اس سال سے موازنہ کرے گا۔

راولپنڈی:(کنزیومر واچ نیوز)
جی ایچ کیو حملہ کیس میں بانی چیئرمین پی ٹی آئی عمران خان نے ویڈیو لنک سماعت کا بائیکاٹ کرتے ہوئے ویڈیو لنک بھی آف کر دیا جبکہ وکلاء بھی بطور احتجاج بائیکاٹ کرتے کمرہ عدالت سے نکل گئے۔
ویڈیو لنک ٹرائل کے لیے ہوم ڈیپارٹمنٹ کا نوٹیفیکیشن عدالت میں چیلنج کیا گیا تھا جبکہ بانی چیئرمین پی ٹی آئی کو عدالت پیش کرنے کے لیے درخواست بھی دائر کی گئی تھی۔ انسداد دہشت گردی عدالت نے چیلنج درخواست سماعت کے لیے منظور کیی تھی۔ وکلائے صفائی فیصل ملک اور بیرسٹر علی بخاری نے دلائل پیش کیے۔
بانی پی ٹی آئی کے ویڈیو لنک حاضری کے خلاف دائر درخواست پر پراسیکیوشن ظہیر شاہ نے دلائل دیتے ہوئے کہا کہ جیل ٹرائل کو اے ٹی سی منتقل کرنا پنجاب حکومت کا ایگزیکٹو آرڈر ہے اور ایگزیکٹو آرڈر پر نظر ثانی آئینی عدالتی کا اختیار ہے۔پراسیکیوٹر ظہیر شاہ نے بتایا کہ 2016 میں سی آر پی سی قانون میں ترمیم کے تحت ملزم کو ویڈیو لنک کے ذریعے پیش کرنے کے منظور دی گئی، اے ٹی ایکٹ کی سیکشن 15،21 کے عدالت کا اختیار ہے کہ وہ ٹرائل کا فیصلہ کرے، حکومت ٹرائل کو ایک سے دوسری جگہ منتقل کرنے کی وجہ بتانے کی بھی پابند نہیں، ملزم کی ویڈیو لنک حاضری کے خلاف درخواست ٹرائل میں رکاوٹ ڈالنے اور وقت ضائع کرنے کے مترادف ہے۔

اسپیشل پبلک پراسیکیوٹر اکرام امین منہاس نے کہا کہ نوٹیفکیشن کے خلاف وکلاء صفائی کا اعلیٰ عدلیہ سے رجوع کرنا انکا حق ہے لیکن ٹرائل نہیں روکا جا سکتا۔
وکیل بانی پی ٹی آئی محمد فیصل ملک نے کہا کہ ہم عدالت سے فیئر ٹرائل کا تقاضا کرتے ہیں، فیئر ٹرائل کے لیے ملزم کی ذاتی حیثیت میں حاضری ضروری ہے، ہمیں صوبائی حکومت کے نوٹیفکیشن کی کاپی کل ملی ہے، ہم اس کے خلاف ہائیکورٹ جائیں گے۔عدالت نے وکلاء صفائی سے استفسار کیا کہ کیا آپ اس درخواست پر مزید دلائل دینا چاہتے ہیں؟ وکلاء صفائی نے لیگل ٹیم سے مشاورت کے لیے آدھے گھنٹے کی مہلت مانگی جس پر ددالت نے سماعت میں آدھے گھنٹے کا وقفہ کیا۔

اہم گواہ فیملی سمیت بیرون ملک چلا گیا

کیس کا ایک اہم گواہ فیملی سمیت بیرون ملک چلا گیا۔ سب انسپکٹر تصدق کی آج گواہی تھی اور اس کی طلبی بھی کی گئی تھی، سب انسپکٹر تصدق کا دو ماہ قبل جزوی بیان بھی ریکارڈ ہو چکا تھا اور آج طلبی پر پیش نا ہونے پر علم ہوا کہ وہ بیرون ملک جا چکا، اس گواہ کی جگہ ارجنٹ دوسرے گواہ کو تفتیشی ٹیم لے آئی۔وقفے کے بعد سپرنٹنڈنٹ جیل اڈیالہ کو ویڈیو لنک تیار رکھنے اور بانی چیئرمین پی ٹی آئی کو ویڈیو لنک پر پیش ہونے کی ہدایت بھی جاری کی گئی۔ پراسیکیوٹر نے بتایا کہ آج ایک گواہ کا ویڈیو لنک لازم ہوگا، گواہ تیار ہے اور جیل سے ویڈیو لنک آن ہوتے ہی بیان ریکارڈ شروع ہو جائے گا۔عمران خان نے ویڈیو لنک سماعت کا بائیکاٹ کر دیا اور ویڈیو لنک بھی آف کر دیا گیا۔ پی ٹی آئی وکلاء بھی بطور احتجاج بائیکاٹ کرتے کمرہ عدالت سے نکل گئے۔ بانی چیئرمین پی ٹی آئی ویڈیو لنک پر تھوڑی دیر سامنے آئے۔دوران ویڈیو لنک وکلاء نے بانی سے گفتگو کرتے ہوئے کہا کہ سر یہ ویڈیو لنک سماعت غیر آئینی اور آپ کو آئیسولیشن میں رکھنے کے لیے ہے، ہم وکلاء بطور احتجاج بائیکاٹ کر رہے ہیں اور ہائی کورٹ بھی جا رہے ہیں۔بانی چیئرمین پی ٹی آئی نے کہا کہ آپ کا فیصلہ درست ہے اور میں بھی بائیکاٹ کرتا ہوں۔ عمران خان کے بائیکاٹ کہتے ہی ویڈیو لنک آف ہوگیا۔
عدالت نے کہا کہ بائیکاٹ کے باوجود عدالت اپنی کارروائی جاری رکھے گی۔ عدالت نے سرکاری گواہ کا بیان ریکارڈ کرنا شروع کیا اور پراسیکیوٹر ظہیر علی شاہ نے بیان ریکارڈ کروایا۔
عدالت نے ریمارکس دیے کہ آج ہم بیان ریکارڈ کر لیتے ہیں، ملزمان وکلاء پھر جرح کر سکیں گے۔ سب انسپکٹر منظور کے بیان کی ریکارڈنگ کی گئی جبکہ دوسرے گواہ سب انسپکٹر سلیم بھی عدالت احاطہ موجود رہے۔جی ایچ کیو حملہ کیس سماعت 23 ستمبر تک ملتوی کر دی گئی، دو گواہوں سب انسپکٹر منظور اور سب انسپکٹر سلیم کے بیان ریکارڈ کیے گئے۔ کیس کی سماعت اے ٹی سی امجد علی شاہ نے کی۔

عمران خان کو عدالت پیش کرنے کی درخواست

وکیل صفائی فیصل ملک نے درخواست دائر کی جس میں موقف اپنایا کہ شفاف ٹرائل کے لیے بانی چیئرمین پی ٹی آئی کو عدالت پیش کرنا لازم ہے۔فیصل ملک ایڈووکیٹ کا کہنا تھا کہ ویڈیو لنک ٹرائل نوٹیفکیشن ہمیں کل جمعرات 5بجے دیا گیا، سلمان اکرم راجا ایڈووکیٹ اس نوٹیفیکیشن کو کل ہائی کورٹ میں چیلنج کریں گے، ہائی کورٹ راولپنڈی بینچ میں نوٹیفکیشن چیلنج ہوگا۔وکیل صفائی فیصل ملک نے کہا کہ فئیر ٹرائل ملزم کے بغیر کیسے ہوگا دیکھتے ہیں، بانی چیئرمین کی عدالت طلبی درخواست دی ہے اور امید ہے آج عدالت طلبی کرے گی، یہ باہر کیا ماحول بنا دیا، حکومت خود فریق ہے اس لیے ویڈیو ٹرائل نہیں ہو سکتا۔راولپنڈی انسداد دہشتگردی عدالت میں سیکیورٹی کے سخت ترین انتظامات کیے گئے ہیں، راولپنڈی پولیس کے 700 سے زائد پولیس اہلکار و افسران اے ٹی سی راولپنڈی تعینات کیے گئے۔ ٹریفک روانی کے لیے 50 سے زائد ٹریفک اہلکار و افسران ڈیوٹی پر تعینات کیے گئے۔واضح رہے کہ عدالت نے آج 3 اہم گواہان کی طلبی کر رکھی تھی جبکہ 119 میں سے 27 گواہان کے بیانات ریکارڈ کیے جا چکے۔ ڈھائی ماہ کے طویل وقفے کے بعد جی ایچ کیو حملہ کیس میں گواہان کے بیانات ریکارڈ کیے گئے۔عدالت کے باہر کمشنر آفس تا ضلع کونسل گیٹ روڈ مکمل سیل کی گئی۔ وکلاء، ملزمان، میڈیا کی گاڑیوں اور ڈی ایس این جیز کی یہاں پارکنگ بھی ممنوع قرار دی گئی۔

کراچی (کنزیومر واچ نیوز)جمیعت علما اسلام کے سربراہ مولانا فضل الرحمان نے پاکستان اور سعودی عرب کے درمیان ہونے والے اسٹریٹیجک دفاعی معاہدے کا خیر مقدم کرتے ہوئے کہا ہے کہ اب دونوں ممالک کو آگے بڑھ کر اپنی صلاحیت کے مطابق اسلامی دنیا کی قیادت کرنی چاہیے۔
سندھ امن مارچ کے اختتام پر کراچی میں جلسے سے خطاب کرتے ہوئے مولانا فضل الرحمان نے کہا کہ جے یو آئی صرف پاکستان کی نہیں امت کی، فلسطین، بیت المقدس کی آزادی اور قربانی دینے والوں کی آواز ہے۔انہوں نے کہا کہ آج فلسطین پر قبضے کی بات ہورہی ہے مگر میں نے ایک ہفتے قبل پنڈی کے ایک جلسے میں کہا تھا کہ اسلامی دنیا کے درمیان ایک بلاک ہونا چاہیے، یہ جے یو آئی کا منشور ہے، جب تک مسلمان ممالک ایک دوسرے کے خلاف رہیں گے دنیا غلام بنائے گی۔سربراہ جے یو آئی نے کہا کہ دوحہ اور قطر میں عرب اسلامی اتحاد کانفرنس اسلامی دنیا کے اتحاد اچھا آغاز ہے، لوگوں نے اس کانفرنس سے بہت توقعات وابستہ کیں تھیں مگر ہمیں دوحہ اجلاس سے کوئی بڑی توقعات نہیں تھیں، مگر یہ اسلامی بلاک کی طرف ایک قدم تھا، اس کی حوصلہ افزائی ضروری ہے۔انہوں نے کہا کہ اسلامی ممالک سوچیں کہ رکاوٹ اور اختلاف کہاں ہے، جسے ختم کرنا اور متحد ہوکر آگے بڑھنا ضروری ہے۔ فضل الرحمان نے کہا کہ اسلامی دنیا کی مشترکہ دفاعی قوت ضروری ہے، سعودی عرب کے بادشاہ نے ہمارے وزیراعظم کو بلاکر دو طرفہ دفاعی معاہدے پر دستخط کیے۔سربراہ جے یو آئی نے کہا کہ ہم نے ہر مرحلے پر یہی بات کی کہ فلسطین، کشمیر، برما یا مسلمانوں کے حق کا سوال پیدا ہو تو سعودی عرب اور پاکستان دونوں اسلامی دنیا کی قیادت کی صلاحیت رکھتے ہیں، دونوں ممالک اپنی صلاحیت کو استعمال کرتے ہوئے اسلامی دنیا کی قیادت کریں۔اُن کا کہنا تھا کہ ہمارے نظریے اور منشور کے مطابق دفاعی معاہدہ ہوا اور یہ اسلامی دنیا کے مشترکہ دفاع کی حکمت عملی کا آغاز ہے، ایسے مقاصد کی منازل بیک وقت طے نہیں ہوتیں بلکہ وقت لگتا ہےمولانا فضل الرحمان نے کہا کہ غزہ کے مسلمانوں اور فلسطین کی آزادی کی بات کروں گا، پاکستان اور سعودی عرب کے حکمران مسئلہ فلسطین کے حل کیلیے دو ریاستی حل کی تجویز پیش کرتے ہیں جس سے ہم اسرائیل کے مقابلے میں اپنی کمزوری ظاہر کرتے ہیں اور اسرائیل اس کا ناجائز فائدہ اٹھاتا ہے۔سربراہ جے یو آئی نے کہا کہ پاکستان کی بنیاد جب 1947 میں پڑی تو ہم نے کہا کہ اسرائیل ناجائز وجود ہے اور فلسطین کی زمین پر قبضہ ہے، فلسطینی ایک فلسطین اور اسرائیل گریٹر اسرائیل کی بات کرتا ہے، ہمیں ہر فورم پر فلسطینی کی بات پر مضبوط مؤقف دینا چاہیے، کسی قسم کی لچک اسرائیل کی مضبوطی کا سبب بنے گی، فلسطین کا ساری زمین کا دعویٰ ہر اعتبار سے جائز ہے۔اُن کا کہنا تھا کہ دنیا ہماری تجویز پر غور کرے، کمزور پوزیشن لینا مسئلے کے حل کو بند کرتا ہے۔ فضل الرحمان نے غزہ کی طرف سفر کرنے والے قافلے صمو فلوٹیلا کی پذیرائی کرتے ہوئے کہا کہ اس قافلے میں ہمارے ملک سے کچھ نوجوان شامل ہوئے، ہم اُس قافلے کو سلام پیش کرتے ہیں اور پاکستانی بھائیوں کو حوصلہ دیتے ہیں، انشاء اللہ یہ پوری قوم کی نمائندگی ہوگی۔اُن کا کہنا تھا کہ سندھ کے ایک سرے سے دوسرے سرے تک عوامی امن مارچ کیا، عظیم والشان جلسے کے انعقاد پر شکریہ ادا کرتا ہوں۔ انہوں نے کہا کہ بتانا چاہتا ہوں کے پی کے میں امن نام کی کوئی چیز نہیں ہے، بلوچستان میں امن تباہ ہے اور وہاں کے لوگوں کو اٹھا کر لاپتا کردیا جاتا ہے۔مولانا فضل الرحمان نے کہا کہ کوئٹہ میں اس ظلم کیخلاف جمیعت علما نے آواز بلند کی، ہم اپنے منشور پر عمل کرنا جانتے ہیں جبکہ دوسری جماعتیں اپنے منشور پر نہیں چلتیں۔انہوں نے کہا کہ ہماری راہوں میں رکاوٹیں کھڑی کی جارہی ہیں مگر ہماری آج بھی پُرامن جدوجہد جاری ہے۔ جے یو آئی نے عوام کو آواز دی تو آپ کو پتا چل جائیگا کہ اسلام آباد پر کیسے قبضہ ہوتا ہے۔فضل الرحمان نے کہا کہ ہم امن کی آواز ہیں اور ہر پاکستانی کا دل امن کا متلاشی ہے، ہم نے یہودیت کا مقابلہ کیا اور مسلمان بھائیوں کے ساتھ کھڑے ہوئے، قادیانیت کی جس طرح ہم نے کمر توڑی، وہ اب کھڑے نہیں ہوسکتے