کراچی(پاکستان واچ نیوز)جامعہ ہمدرد کی فیکلٹی آف انجینئرنگ سائنسز اینڈ ٹیکنالوجی کے تحت شعبہ اپلائیڈ سائنسز کے فوڈ سائنس اینڈ ٹیکنالوجی پروگرام کی جانب سے ایک شاندار اور معلوماتی “فوڈ پروڈکٹس ڈسپلے ایکٹیویٹی” کا انعقاد کیا گیا، جس میں طلبہ و طالبات نے جدید، غذائیت سے بھرپور اور تحقیقی بنیادوں پر تیار کردہ فنکشنل فوڈ مصنوعات پیش کرکے حاضرین کو بے حد متاثر کیا۔ تقریب میں 50 سے زائد طلبہ نے اپنی تخلیقی صلاحیتوں اور سائنسی مہارت کا عملی مظاہرہ کرتے ہوئے زرعی ضمنی مصنوعات اور مقامی خام مال سے تیار کردہ منفرد غذائی اشیاء نمائش کے لیے پیش کیں۔
تقریب کا مقصد نوجوان فوڈ سائنٹسٹس کو عملی میدان میں اپنی صلاحیتیں اجاگر کرنے کے مواقع فراہم کرنا، غذائی تحقیق کو فروغ دینا، اور زرعی فضلے کو کارآمد و صحت بخش غذائی مصنوعات میں تبدیل کرنے کے جدید تصورات متعارف کروانا تھا۔
نمائش میں فنکشنل ڈرنکس، بیکری مصنوعات، کنفیکشنری آئٹمز، جام، اسکواش، صحت بخش اسنیکس، گلوٹن فری مصنوعات، پھلوں پر مبنی غذائی اشیاء اور دیگر غذائیت سے بھرپور مصنوعات شامل تھیں۔ ان مصنوعات کا بنیادی مقصد صحت مند خوراک کے فروغ، غذائی قلت میں کمی اور پائیدار فوڈ سسٹم کے قیام میں اپنا کردار ادا کرنا تھا۔
تقریب میں مختلف جامعات، تحقیقی اداروں اور فوڈ انڈسٹری سے تعلق رکھنے والے ماہرین تعلیم، معزز اساتذہ اور دیگر مہمانانِ گرامی نے شرکت کی۔ مہمانوں نے طلبہ کے اسٹالز کا تفصیلی دورہ کیا اور ان کی تخلیقی سوچ، تحقیقی مہارت، مصنوعات کی تیاری کے معیار اور پیشہ ورانہ انداز کو بے حد سراہا۔ اس موقع پر ماہرین نے مصنوعات کی پیکیجنگ، ذائقے، معیار، مارکیٹنگ حکمتِ عملی اور تجارتی امکانات کے حوالے سے قیمتی تجاویز بھی پیش کیں۔
نمائش میں پیش کیے گئے متعدد منصوبوں نے مستقبل میں فوڈ اسٹارٹ اپس اور انٹرپرینیورشپ کے روشن امکانات کو اجاگر کیا۔ طلبہ کی جانب سے تیار کردہ کئی مصنوعات ایسی تھیں جنہوں نے زرعی فضلے اور ضمنی اجزاء کو نہایت مؤثر انداز میں قابلِ قدر، غذائیت سے بھرپور اور ماحول دوست مصنوعات میں تبدیل کیا، جو مستقبل میں پاکستان کے فوڈ سیکٹر کے لیے اہم پیش رفت ثابت ہوسکتی ہیں۔
اساتذہ نے اس موقع پر اس امر پر زور دیا کہ تعلیمی اداروں، فوڈ انڈسٹری، تحقیقی مراکز اور فنڈنگ آرگنائزیشنز کے درمیان مضبوط روابط وقت کی اہم ضرورت ہیں تاکہ طلبہ کی تحقیق، اختراعی خیالات اور سائنسی منصوبوں کو عملی اور تجارتی سطح پر متعارف کروایا جاسکے۔
تقریب کے اختتام پر طلبہ اور منتظمین نے شعبہ اپلائیڈ سائنسز کے چیئرمین اور فیکلٹی آف انجینئرنگ سائنسز اینڈ ٹیکنالوجی کے ڈین کا خصوصی شکریہ ادا کیا، جن کی مسلسل رہنمائی، تعاون اور حوصلہ افزائی کے باعث یہ کامیاب علمی و تحقیقی سرگرمی ممکن ہوئی۔
Blog
-
جامعہ ہمدرد کی فیکلٹی آف انجینئرنگ سائنسز اینڈ ٹیکنالوجی کے تحت فوڈ پروڈکٹس ڈسپلے ایکٹیویٹی” کا انعقاد
-
امریکی میڈیا کا ایرانی صدر کے مستعفی ہونے کا دعویٰ، پاسداران انقلاب نے تردید کردی
تہران(ویب ڈیسک ) امریکی نشریاتی ادارے فاکس نیوز نے دعویٰ کیا ہے کہ ایران کے صدر مسعود پزشکیان نے مبینہ طور پر اپنے اختیارات محدود ہونے کے باعث استعفیٰ دینے کی درخواست کی ہے۔
رپورٹس کے مطابق مسعود پزشکیان نے سپریم لیڈر آیت اللہ مجتبیٰ خامنہ ای کے دفتر کو بتایا کہ انہیں اہم فیصلوں کے عمل سے باہر رکھا جا رہا ہے، جس کی وجہ سے وہ اپنی آئینی ذمہ داریاں مؤثر طریقے سے ادا نہیں کر پا رہے۔
بعض رپورٹس میں دعویٰ کیا گیا ہے کہ ایران کی طاقتور پاسداران انقلاب گارڈز اور دیگر سخت گیر حلقوں کا اثر و رسوخ بڑھنے سے منتخب حکومت کا کردار کمزور ہوگیا ہے، جس کے باعث صدر اور ان کی کابینہ بڑے فیصلوں سے الگ ہوگئے ہیں۔
تاہم ایرانی حکام نے ان خبروں کی سختی سے تردید کی ہے، صدارتی دفتر کے عہدیداروں اور پاسداران انقلاب گارڈز سے وابستہ ذرائع نے کہا ہے کہ صدر نے ناتو استعفیٰ دیا ہے اور نا ہی انہوں نے ایسی کوئی درخواست کی ہے، صدر مسعود پزشکیان بدستور اپنے فرائض انجام دے رہے ہیں۔
یہ خبریں ایسے وقت میں سامنے آئی ہیں جب ایران اور امریکا کے درمیان مذاکرات جاری ہیں اور ایران کے اندر مختلف سیاسی دھڑوں کے درمیان اختلافات کی اطلاعات بھی زیر گردش ہیں۔
تاہم ایرانی حکومت کی جانب سے صدر مسعود پزشکیان کے استعفے کی سرکاری سطح پر تاحال تصدیق نہیں کی گئی
Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگا۔اے آئی یا انٹرٹینمنٹ مواد صرف تفریح کے لیے ہے -
آئندہ مالی سال برآمدات ملکی تاریخ کی بلند ترین سطح پرپہنچنےکاامکان
اسلام آ باد(ویب ڈیسک )پاکستان کی برآمدات یکم جولائی سےشروع ہونے والے آئندہ مالی سال 27-2026 کے دوران ملکی تاریخ کی بلند ترین سطح پرپہنچنےکا امکان ہے۔ آئی ایم ایف نےآئندہ مالی سال پاکستان کی برآمدات، تجارتی خسارے اوردرآمدات میں اضافےکا تخمینہ لگایا ہے۔ آئی ایم ایف نے آئندہ مالی سال پاکستان کی برآمدات بڑھ کر ریکارڈ 35 ارب63 کروڑڈالرپر پہنچنےکا تخمینہ لگایا ہے۔آئی ایم ایف کے تخمینہ جات کے مطابق 20 جون کو ختم کو ہونے والے رواں مالی سال 26-2025 کے دوران پاکستان کی برآمدات31 ارب 93 کروڑ ڈالرز رہنے کا امکان ہے جو آئندہ مالی سال 27-2026 کے دوران بڑھ کر 35 ارب 63 کروڑ ڈالرز پر پہنچ جائیں گی۔
Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگا۔اے آئی یا انٹرٹینمنٹ مواد صرف تفریح کے لیے ہے -
ایران سے مسلح کشیدگی ختم ہوگئی، تنازع مکمل حل نہیں ہوا؛ صدر ٹرمپ کا دعویٰ
واشنگٹن (ویب ڈیسک )امریکی صدر ٹرمپ نے امریکی کانگریس کو ایک خط لکھ کر دعویٰ کیا ہے کہ ایران کے ساتھ جاری مسلح کشیدگی اب ختم ہو چکی ہے تاہم تنازع مکمل طور پر حل نہیں ہوا۔صدر ٹرمپ نے یہ خط کانگریس کے اسپیکر مائیک جونسن اور سینیٹ کے صدر چک گراسلی کے نام ارسال کیا، جس میں انہوں نے مؤقف اختیار کیا کہ 28 فروری سے شروع ہونے والی کشیدگی کا مرحلہ اب اختتام کو پہنچ گیا ہے۔خط میں ٹرمپ نے لکھا کہ ان کی حکومت خطے میں پائیدار امن کے قیام کے لیے کوشاں ہے، تاہم اس کے باوجود جنگ جاری رہنے کا امکان بھی موجود ہے۔ انہوں نے یہ بھی تسلیم کیا کہ ایران کے ساتھ تنازع مکمل طور پر حل نہیں ہوا اور صورتحال اب بھی غیر یقینی ہے۔دوسری جانب ماہرین کا کہنا ہے کہ اس نوعیت کا مؤقف اختیار کر کے ٹرمپ انتظامیہ ممکنہ طور پر کانگریس سے باقاعدہ جنگی منظوری لینے کی آئینی ضرورت سے بچنا چاہتی ہے حالانکہ خطے میں امریکی افواج کی موجودگی برقرار ہے۔
: Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگا
۔اے آئی یا انٹرٹینمنٹ مواد صرف تفریح کے لیے ہے۔ -
’’آنکھیں بند کرو، رقم ڈبل‘‘ شہری نے ایک لاکھ روپے دیدیے، پھر کیا ہوا؟
لاہور:(ویب ڈیسک )آنکھیں بند کرو اور رقم ڈبل کے لالچ نے شہری کو بڑی رقم سے محروم کردیا۔ٹبی سٹی کے علاقے میں پولیس نے معصوم شہریوں کے ساتھ نوسربازی کرنے والے ایک ملزم کو گرفتار کر لیا۔ ملزم شہریوں کا پیچھا کرتا اور موقع ملنے پر انہیں جھانسا دے کر رقم ہتھیا کر فرار ہو جاتا تھا۔ملزم شہری کو اسٹاپ پر کھڑا دیکھ کر اس کے قریب آیا اور باتوں باتوں میں اعتماد بحال کیا۔ ملزم نے شہری کو کہا کہ اگر رقم ڈبل کرنی ہے تو وہ اسے رقم دے اور 100 قدم آنکھیں بند کر کے چلے، جس پر شہری اس کے جھانسے میں آ گیا۔پولیس کے مطابق شہری نے ملزم کو ایک لاکھ روپے نقد دیے، تاہم جب شہری نے آنکھیں کھولیں تو ملزم رقم لے کر موقع سے فرار ہو چکا تھا۔ متاثرہ شہری نے فوری طور پر پولیس کو اطلاع دی جس پر کارروائی کا آغاز کیا گیا۔
ٹبی سٹی پولیس نے اطلاع ملنے پر فوری ریسپانس کرتے ہوئے ملزم عرفان کو گرفتار کر لیا۔ ایس پی سٹی عاطف امیر کا کہنا ہے کہ شہر میں جرائم کے انسداد کے لیے کڑی نگرانی کی جا رہی ہے ۔ شہریوں کو لوٹنے والوں کے خلاف بلاامتیاز کارروائی جاری رہے گی۔
: Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگا
۔اے آئی یا انٹرٹینمنٹ مواد صرف تفریح کے لیے ہے۔ -
پیٹرول پر 153 اور ڈیزل پر 116 روپے کے بھاری ٹیکسز اور مارجنز لیے جانے کا انکشاف
اسلام آباد(ویب ڈیسک )ملک میں پیٹرولیم مصنوعات پر عائد ٹیکسوں اور مارجنز کی تفصیلات سامنے آ گئی ہیں۔نجی ٹی وی کی رپورٹ میں ذرائع کے حوالے سے انکشاف کیا گیا ہے کہ ایک لیٹر پیٹرول پر 153 روپے 55 پیسے جبکہ ہائی اسپیڈ ڈیزل پر 116 روپے 46 پیسے وصول کیے جا رہے ہیں۔پیٹرول کی ڈیوٹی سے قبل ایکس ریفائنری قیمت 246 روپے 31 پیسے ہے، تاہم مختلف ٹیکسز اور مارجنز کی شمولیت کے بعد عوام کے لیے پیٹرول کی حتمی قیمت 399 روپے 86 پیسے فی لیٹر مقرر کی گئی ہے۔رپورٹ میں بتایا گیا ہے کہ پیٹرول کی قیمت میں 23 روپے 72 پیسے کسٹم ڈیوٹی، 7 روپے 32 پیسے ان لینڈ فریٹ مارجن، 7 روپے 87 پیسے مارکیٹنگ کمپنیوں کا مارجن اور 8 روپے 64 پیسے پمپ ڈیلرز کا کمیشن شامل ہے۔مزید برآں ایک لیٹر پیٹرول کی قیمت میں 103 روپے 50 پیسے کی پیٹرولیم لیوی اور 2 روپے 50 پیسے کی کلائمیٹ سپورٹ لیوی بھی شامل ہے، جو حتمی قیمت کا ایک بڑا حصہ بنتی ہے۔اسی طرح ہائی اسپیڈ ڈیزل کی اصل ایکس ریفائنری قیمت 283 روپے 12 پیسے ہے، جس پر تمام تر ٹیکسز اور منافع جات شامل کرنے کے بعد شہریوں کے لیے قیمت 399 روپے 58 پیسے ہو جاتی ہے۔
: Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگا
۔اے آئی یا انٹرٹینمنٹ مواد صرف تفریح کے لیے ہے۔ -
پی ایس ایل: حنین شاہ یا حسان خان، حیدرآباد کنگزمین کی فتح کا اصل ہیرو کون؟
کراچی (ویب ڈیسک )پاکستان سپر لیگ (پی ایس ایل) کے ایلیمینیٹر 2 میں نا آموز حیدرآباد کنگزمین نے دو بار کی فاتح اسلام آباد یونائیٹڈ کو شکست دے دی۔
قذافی اسٹیڈیم لاہور میں کھیلے گئے میچ میں اسلام آباد یونائیٹڈ نے ٹاس جیت کر حیدرآباد کنگزمین کو پہلے بیٹنگ کرنے کی دعوت دی۔
حیدرآباد نے مقررہ 20 اوورز میں 5 وکٹوں کے نقصان پر 186 رنز بنائے۔ہدف کے تعاقب میں اسلام آباد یونائیٹڈ ابتداء میں دو اہم وکٹیں گنوا بیٹھی تاہم تیسری اور پھر پانچویں وکٹ کی شراکت اسلام آباد کو میچ میں واپس لے آئی۔
مارک چیپمین، حیدر علی، کرس گرین اور فہیم اشرف کی جارحانہ اننگز نے اسلام آباد کو جیت کی امید دلائی لیکن آخری اوور میں حنین شاہ نے نہ صرف فہیم اشرف کو آؤٹ کیا بلکہ کرس گرین اور عماد وسیم کو بھی کھل کر نہ کھیلنے دیا۔
حنین شاہ کی شاندار بولنگ کے باعث اسلام آباد کی ٹیم آخری اوور میں صرف 6 رنز کا ہدف بھی حاصل نہ کرسکی۔
حیدرآباد کی اس فتح میں جہاں حنین شاہ کی شاندار بولنگ کارگر ثابت ہوئی وہیں 17ویں اوور کے آغاز میں حسان خان کا ڈیپ اسکوائر لیگ کی باؤنڈری پر یقینی چھکے کو سنگل رن میں تبدیل کرنا میچ کا ٹرننگ پوائنٹ ثابت ہوا تھا۔: Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگا
۔اے آئی یا انٹرٹینمنٹ مواد صرف تفریح کے لیے ہے۔ -
گلگت بلتستان اور پختونخوا میں گلیشیئر پھٹنے، شدید بارشوں اور سیلاب کا خطرہ
پشاور (ویب ڈیسک )گلگت بلتستان اور خیبر پختونخوا میں گلیشیئر پھٹنے، شدید بارشوں اور سیلاب کا خطرہ درپیش ہے، اس سلسلے میں محکمہ موسمیات کی جانب سے الرٹ جاری کردیا گیا ہے۔محکمہ موسمیات نے گلیشیل لیک آؤٹ برسٹ فلڈ (GLOF) کے خطرے کے پیش نظر الرٹ جاری کر دیا ہے، جس کے مطابق 3 مئی 2026 سے ایک معتدل مغربی لہر پاکستان کے بالائی علاقوں میں داخل ہونے کی توقع ہے۔اس دوران گلگت بلتستان اور خیبر پختونخوا میں بڑے پیمانے پر بارش، آندھی، گرج چمک اور بعض مقامات پر موسلادھار بارشوں کا امکان ظاہر کیا گیا ہے۔محکمہ موسمیات کے مطابق درجہ حرارت میں اچانک اضافے کے بعد اس نوعیت کی بارشیں معمول کا حصہ ہوتی ہیں، تاہم یہ صورتحال گلیشیل لیک آؤٹ برسٹ فلڈ، ملبے کے بہاؤ اور سیلاب کے خطرات کو بڑھا دیتی ہے۔ خاص طور پر ہوپر، غلکین، ششپر، یاسین، پھنڈر، بڈسوات، لوئر ہنزہ، نگر، گھانچے، دیر اور دیر بالا جیسے علاقے زیادہ خطرے کی زد میں ہیں۔حکام نے برفانی وادیوں میں رہنے والے افراد کو ہدایت کی ہے کہ بارش کے دوران ندی نالوں اور دریا کے کناروں کے قریب جانے سے گریز کریں۔ مقامی ندیوں میں پانی کے رنگ میں اچانک تبدیلی یا غیر معمولی آوازوں جیسے پتھروں کے ٹکرانے کی صورت میں فوری احتیاط برتی جائے اور محفوظ مقامات کی طرف منتقل ہو جائیں۔مزید ہدایت کی گئی ہے کہ مویشیوں اور ضروری اشیا کو بلند اور محفوظ مقامات پر منتقل کیا جائے اور کمیونٹی بیسڈ ڈیزاسٹر رسک مینجمنٹ کمیٹیوں کے ساتھ قریبی رابطہ رکھا جائے۔محکمہ موسمیات کے مطابق ڈیزاسٹر مینجمنٹ حکام 24 گھنٹے چوکس ہیں اور دور دراز علاقوں میں تکنیکی فوکل پرسنز کے ساتھ رابطہ برقرار رکھا جا رہا ہے۔محکمہ موسمیات نے تمام متعلقہ افراد کو ہدایت کی ہے کہ وہ صورتحال پر نظر رکھیں، احتیاطی تدابیر اختیار کریں اور کسی بھی ناخوشگوار واقعے سے بچنے کے لیے پیشگی اقدامات یقینی بنائیں تاکہ جانی و مالی نقصان سے محفوظ رہا جا سکے۔
: Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگا
۔اے آئی یا انٹرٹینمنٹ مواد صرف تفریح کے لیے ہے۔ -
ایران سے فون پر مذاکرات جاری ہیں، امریکی صدر
واشنگٹن (ویب ڈیسک )امریکی صدر ڈونلڈ ٹرمپ کا جنگ پھر سے شروع کرنے کی دھمکی کے بعد ایک خوش آئند بیان سامنے آگیا۔امریکی صدر نےکہا ایران کے ساتھ فون پر مذاکرات جاری ہیں، ساتھ یہ بھی کہا کہ ایران کے پاس جوہری ہتھیار نہیں ہونے چاہیے، ایران کوکہنا ہوگا کہ وہ ہارگئے ہیں کیونکہ ہم ایران کے خلاف جنگ میں اپنے مقاصد تقریباً حاصل کرچکے ہیں۔صدر ٹرمپ نے دعویٰ کیا کہ ایران کے 82 فیصد میزائل تباہ اور 159 بحری جہاز ڈبو دیے ہیں، ایرانی کرنسی کی کوئی قدروقیمت نہیں رہی۔امریکی صدر نے یہ بھی بتایا کہ روسی صدر پیوٹن کے ساتھ ایران اور یوکرین کے معاملے پر ان کی فون پر بات چیت ہوئی ہے۔
انہوں نے پیوٹن سےکہا ہےکہ امریکا جنگ بند کرنے میں مدد دینے سے پہلے روس کو اپنی جنگ بند کرنی ہوگی۔ٹرمپ نے دعویٰ کیا کہ پیوٹن نے ایران کی جانب سے یورینیم افزودگی کے معاملے پر فکرمندی کا اظہار کیا ہے۔: Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگا
۔اے آئی یا انٹرٹینمنٹ مواد صرف تفریح کے لیے ہے۔ -
افغان طالبان رجیم کا انگور اڈہ میں سول آبادی پر حملہ، بچوں سمیت8 افراد زخمی
پشاور (ویب ڈیسک ) افغان طالبان رجیم نے جنوبی وزیرستان کے علاقے انگور اڈہ میں شہری آبادی پر حملہ کردیا۔سکیورٹی ذرائع کے مطابق 29 اپریل کو افغان طالبان نے انگور اڈہ سے ملحقہ سرحدی علاقے میں شہری آبادی پرگولہ باری کی۔افغان طالبان کی جانب سے فائر کیا گیا مارٹر گولہ شہری کریم خان اور رحمت اللہ کے گھر پر گرا جس کے نتیجے میں ان کے خاندان کے 5 افراد زخمی ہوگئے۔سکیورٹی ذرائع کا کہنا ہے کہ میڈیکل آفیسر ڈاکٹراشفاق کے مطابق اسپتال میں3 بچوں سمیت 5 زخمی اسپتال لائے گئے ہیں۔ڈپٹی کمشنرجنوبی وزیرستان لوئر نے گولہ باری سے ہونےوالےنقصانات کی تفصیلات بتاتے ہوئے کہا کہ انگوراڈہ میں فائرنگ اور گولہ باری سے متعدد گھرتباہ ہوئے، گولہ باری کے نتیجے میں بچوں اورخواتین سمیت 8افراد زخمی ہوئے۔انگوراڈہ سےزخمیوں کوفوری طبی امداد کے بعد ڈی آئی خان اور پشاور پہنچایا گیا ہے۔
: Disclaimer
خبریں مستند ذرائع سے لی جاتی ہیں، غلطی کی صورت میں ادارہ ذمہ دار نہیں ہوگا
۔اے آئی یا انٹرٹینمنٹ مواد صرف تفریح کے لیے ہے۔